1344_SV

In nomine Patris et Filii et Spiritus Sancti, amen.

Anno nativitatis domini nostri Iesu Christi millesimo trecentesimo quadragessimo quarto, indictione duodecima, die vigesimoprimo mensis augusti, Veneciis in palacio Communis, presentibus sapientibus et elloquentibus viris dominis Nicollao Pistorino Ducatus Veneciarum honorabili cancellario, Nicolino de Franganesco, ser Stefano de Franchino, ser Iacobelo Venerio, ser Guido Civrano, ser Rafayno de Caresinis et ser Zanino Vido notariis ducalis palacii et aliis testibus ad hec vocatis et rogatis.

Cum inter illustrem et magnificum dominum dominum Andream Dandulo Dei gratia Veneciarum, Dalmacie atque Chroacie ducem, dominum quarte partis et dimidie tocius Imperii Romanie, ex una parte, et egregium virum dominum Albertum comitem Goricie et Tirolis ex altera, guerra et discordia in partibus Istrie orta foret, occasione iniuriarum, offensionum et derobationum factarum ducalibus subditis in dictis partibus per gentes et subditos dicti domini comitis, et ob hoc suscitata esset gravis materia questionis, tandem prefatus dominus dux de solita benignitate cupiens discordiis quietem imponere et quod inter ipsum et Commune Veneciarum, pro se et eius subditis, terris et locis, et ipsum dominum Albertum Goricie et Tirolis comitem, pro se eiusque heredibus et successoribus et suis subiectis, terris et locis, omne scandalum laudabiliter et amabiliter sopiatur, de voluntate et consensu suorum consiliorum in ducali palacio Veneciarum solenniter ad sonum campane et vocem preconis more solito congregatorum et omnium et singulorum in dictis consiliis existentium et cum ipsis et dicta consilia et omnes et singuli in dictis consiliis existentes, de auctoritate et consensu eisudem domini ducis et cum eo, nomine ipsorum et Communis Veneciarum et omnium suorum subditorum, terrarum et locorum, unanimiter et concorditer, nemine discrepante, fecerunt, constituerunt et ordinaverunt suum et dicti Communis sindicum, actorem et procuratorem et nuncium specialem nobilum virum dominum Andream Michiel de ducali mandato comitem Arbensem, presentem et mandatum sponte suscipientem, ad tractandum et ordinandum de concordia et pace pro ipso domino duce et Communi Veneciarum, pro se et eius subditis, terris et locis, cum dicto domino comite, pro se et suis heredibus et successoribus et eius subditis, terris et locis; et ad ipsam pacem et concordiam faciendam, complendam et firmandam cum omnibus condicionibus, pactis, promissionibus, remissionibus, obligationibus, stipulationibus, penarum adiectionibus, renunciationibus, et aliis quibuscumque que eidem suo sindico videbuntur; et ad iuramentum in animas dictorum constituentium prestandum; et ad recipiendum a dicto domino Alberto comite, pro ipso, eius heredibus et successoribus et subiectis, omnem promissionem, obligacionem et cautelam que sibi videbuntur opportuna; et generaliter ad omnia alia et singula in predictis, circa predicta et quolibet predictorum procuranda, firmanda, recipienda, complenda et facienda que necessaria et utilia fuerint seu que dicto eorum procuratori et sindico videbuntur et que ipse dominus dux cum dictis suis consiliis facere possent.

Etiam, si talia forent, que mandatum exigerent speciale, dantes et concedentes idem dominus dux et eius consilia supradicta eidem suo procuratori et sindico plenum, liberum et generale mandatum cum plena, libera et generali administracione in omnibus et singulis antedictis.

Et promisit idem dominus dux cum dictis suis consiliis mihi notario infrascripto tamquam publice persone, stipulanti et recipienti vice et nomine domini Alberti comitis memorati suorum heredum et successorum et eius subditorum, firmum, ratum et gratum perpetuo habere quicquid per dictum suum procuratorem et sindicum procuratum, promisum vel quomodolibet gestum seu factum fuerit in premissis vel aliquo premissorum, et ipsa omnia et singula attendere, facere, adimplere et effectualiter et inviolabiliter observare et non contrafacere vel venire per se vel alios de iure vel de facto, aliqua occasione, sub obligatione bonorum omnium dicti Communis Veneciarum presentium et futurorum.

(SN) Ego Nicolaus de Alemanis publicus imperiali auctoritate notarius et iudex ordinarius predictis presens fui et de mandato serenissimi domini domini Andree Dandulo Dei gratia Veneciarum, Dalmacie atque Chroacie ducis, domini quarte partis et dimidie tocius Imperii Romanie, in publicam formam scripsi et meum signum appossui consuetum.