Bishop Boniface of Poreč invests Count Albert I of Gorizia, by way of his official proxy Ottolino of Koper, with all the fiefs his family holds from the Bishopric of Poreč, with the sole exception of the Gradule mill, and receives the oath of fealty in return.
In nomine Domini.
Anno a nativitate Eiusdem millesimo duecentesimo nonagesimo secundo, indictione quinta, die dominico quarto mensis Madii, in ecclessia sancte Eufemie de Ruvino Parentine diocesis, presentibus dominis Iohanne abbate monasteri sancti Fe[li]cis de Amianis Torcellane diocesis, presbitero Cursino canonico de Ruvinio, Gabriele, Benedicto, Paulo et Thomasino fratribus de domo Zane de Venetiis, Donzio et Artuico de Parentio et multis aliis testibus ad hec vocatis et rogatis.
Ibique venerabilis pater dominus Bonifatius Dei gratia episcopus Parentinus cum anulo quem in manu tenebat investivit Ottolinum de Iustinopoli nomine et vice magnifici viri domini Alberti illustri[s] comitis Goricie de feudo paterno quod idem comes et sui progenitores habuerunt ab episcopis Parentinis – excepto de molandino de Gradulis, quod molandinum de novo investitum fuit per dominum Ottonem episcopum Parentinum contra inramentum suum, et ideo predictus dominus Bonifatius episcopus, salvo suo iuramento facto ecclesie Romane, non poterat eum investire de dicto molandino – et hanc investituram fecit dictus dominus episcopus, salvis omnibus iuribus ecclesie Parentine competentibus tempore ipsius investiture, quia dictus dominus Ottolinus ostendidit et legit coram vassalis dicte ecclesie de Parentio ibidem congregatis procuratorium unum, cuius tenor talis est: [seq. doc. 1291_PO; hic premite ut ostendatur]
Anno Domini millesimo ducentesimo nonagesimo primo, indictione quarta, die terciodecimo exeunte decembre, presentibus dominis Hermanno plebano de Gurcvelt, Henrico capellano magnifice domine Eufemie comitisse Goricie, Pertoldo de Rotenstayn, Collone de Flasperch, Admaro de Matray, Meynardo de Bolzano et aliis.
Vir magnificus dominus Albertus illustris comes Goricie et Tirolis fecit, costituit et ordinavit Ottolinum fidelem suum de Iustinopoli, habitatorem Pisini, certum nuntium, actorem sindicum et procuratorem ad petendum et recipiendum omnia feuda que habet et visus est hactenus ipse et predecessores sui habuisse ab ecclesia Parentina a venerabili patre domino Bonifatio Dei gratia episcopo Parentino et ad faciendam eidem domino episcopo fidelitatem sive omaticum iuramento prestito vice et loco et nomine iam dicti domini Alberti comitis, et ad omnia et singula faciendum que verus et legittimus procurator facere potest vel ipse facere posset, si personaliter interesset, promittens se firmum et ratum habere quicquid per dictum procuratorem actum seu procuratum fuerit in premissis et quolibet eorumdem, volens insuper dictum procuratorem a cuiuslibet satisdationis onere rellevare, promisit namque michi notario stipulanti sub obligatione bonorum suorum pro omnibus quorum interest vel interesse poterit iudicatum solvi et iuditio sisti.
Actum in castro Pruch in salla superiori memorati domini Alberti comitis Goricie.
Et ego Dietricus imperiali auctoritate notarius predictis interfui et rogatus scripsi.
Et ideo dictus dominus episcopus recepit iuramentum fidelitatis a dicto Ottolino nomine et vice et super animam et in anima dicti domini comitis et ipsius Ottolini, cuius iuramenti forma talis est:
“Ego Ottolinus predictus iuro nomine et vice et super animam et in anima dicti domini Alberti comiti Goricie et mei Ottolini super sancta Dei evangelia, quod ab hac hora in antea usque ad ultimam diem vite mee ero fidelis tibi Bonifatio episcopo Parentino domino meo contra omnem hominem, excepto imperatore seu rege Romanorum. Et quod numquam scienter ero in conscilio vel in facto quod tu amittas vitam vel membrum aliquod, vel quod tu percipias aliquam lesionem in personam vel iniuriam vel contumeliam. Nec ero in conscilio vel facto seu consensu quod tu amittas aliquem tuum honorem vel aliquod tuum ius, vel rem aliquam quam modo possideas vel possidere debeas de iure vel decetero possidebis in futurom. Nec aliquod impedimentum faciam in rebus vel iuribus tuis, nec procurabo impedimentum vel dampnum fieri per alium in rebus vel iuribus tuis. Et si scivero vel audiero de aliquo qui faciat vel velit facere aliquod istorum contra te, pro posse meo prestabo impedimentum, ut non fiat. Et si impedire non potero, quamcitius potero tibi per me vel alium denuntiabo et manifestabo et contra eum, prout potero, bona fide auxilium tibi dabo. Et si contingeret te rem aliquam quam habes vel habere debeas iniuste vel fortuito caso amittere, eam te recuperare iuvabo et recuperatam omni tempore retinere. Et si scivero te contra aliquem iuste velle facere, et inde specialiter vel generaliter fuero requisitus, meum tibi, sicut potero, prestabo et dabo auxilium et conscilium. Et si aliquid michi in secreto manifestaveris, sine tua licentia nemini manifestabo, nec procurabo quod manifestetur. Et si conscilium a me super aliquo facto postulaveris, illud conscilium, quod magis iustum et utile michi videbitur, tibi dabo. Ad curiam tuam vocatus veniam, nisi de licentia tua remaneam, et in tua curia requisitus iustam secundum meam conscientiam dabo sententiam, et datam sententiam per curiam servabo et servari faciam pro posse meo. Et cetera faciam que fidelis vassallus debet facere domino suo.”
(SN) Ego Beltramus filius condam Petri Pape civitatis Mediolanensis publicus imperiali auctoritate notarius predictis omnibus interfui scripsi et publicavi meoque signo consueto signavi rogatus.
This is the oldest recorded investiture of the counts of Gorizia performed by the bishops of Poreč.