1281_PG

Anno Domini millesimo ducentesimo octuagesimo primo, indictione nona, die terciodecimo exeunte martio, in Civitate Austria in palatio patriarchali, presentibus domini Bernardo decano ecclesie Civitatensis, Artuico de Castello, Detalmo de Vilalta, Asquino da Varmo, Nicolao de Budrio, Iohanne de Çucula, Iacobo de Rogonia, Rodulfo de Mels, Wilelmo Civitatensi, Petro Utinensi castaldionibus, Iacobo Basadone de Clemona et aliis multis.

Reverendus pater dominus Raymundus Dei gratia sancte sedis Aquilegensis patriarcha pro se ac subditis suis ex parte una et vir magnificus dominus Albertus comes Goricie pro se ac subditis suis ex altera compromiserunt in virum magnificum dominum Maynardum comitem Tirolis et virum nobilem dominum Girardum de Camino presentes, electos ab eis concorditer arbitros, arbitratores et amicabiles compositores, promittentes inter se adinvicem stipulatione stare, parere et non contravenire omni laudo et arbitrio eorum quod laudaverint vel fuerint arbitrati cum scriptura vel sine, semel vel pluries, diebus feriatis et non feriatis^a, presentibus partibus et absentibus dum tamen citatis, ubicumque, quomodocumque, quandocumque infra proximos octo dies venturos et ipsis obedire in terminis constituendis et in omnibus et singulis que ipsis arbitris secundum iusticiam vel amorem, plus vel minus, alte vel plane, videbuntur expedire super universis et singulis questionibus et controversiis que vertebantur et erant inter eos nomine et occasione:

[1] castri Cormonis,

[2] stratarum a Monte Crucis et Pontayba usque ad mare,

[3] mutarum que ab hominibus domini comitis et hominum suorum per mutarios domini patriarche exigebantur,

[4] iudicii et advocatie de Ronchis,

[5] cuiusdam pecunie summe pro castro Belgradi solvende,

[6] feudorum que homines et vasalli domini Alberti comitis ab eo habere tenentur et que ipsi dominus comes habet ab Aquilegensi ecclesia,

[7] dampnorum a partibus utriusque datorum,

[8] castri de Mospurch,

[9] mutarum per dominum comitem in Collibus vel alibi in dominio et iurisdictione domini patriarche impositorum de novo,

[10] advocatiarum per ipsum dominum comitem vel antecessores eius venditarum vel obligatarum,

[11] Castri Novi apud Cerolach,

[12] mansorum domini Henrici de Portis, Sigeri de Wisinwich et aliorum ministerialium domini patriarche per dominum comitem vel suos occupatorum iniuste,

[13] et ministerialium qui nati sunt ex dominabus Aquilegensis ecclesie cum ministerialibus domini comitis matrimonialiter copulatis et econverso.

Omneque dampnum et litis expensas ac interesse quod vel quas unus occasione alterius sive culpa faceret vel sustineret in iudicio sive extra inter se vicissim per stipulationem alter alteri reficere promiserunt, nec contra predicta vel aliquod predictorum per se vel alios aliquo tempore facere vel venire ratione aliqua, ingenio sive cause sub pena quatuor milium marchrum denariorum Aquilegensis monete adinvicem inter eos stipulatione promissa, quam pars que contra predicta fecerit parti ea observanti solvere teneatur et dare, et ea soluta et exacta vel non presens compromissum et laudum seu arbitrium ferendum sub eadem pena nichilominus teneant et habeant plenum robur.

(SN) Ego Henricus Civitatensis imperiali auctoritate notarius predictis interfui et rogatus scripsi in forma publica reducendo.