Aquileian Patriarch Gregory of Montelongo and Count Albert I of Gorizia agree to support each other militarily against the Commune of Koper should either party be attacked, with the patriarch first attempting diplomatic resolution through letters or messengers before military action in case of Koper’s attack on the Gorizian count.
Anno Domini millesimo CCo LXVIIo, indictione Xa, die tercio intrante iulio.
In Austria Civitate in camera patriarchali, presentibus venerabilibus viris dominis Alberto episcopo Concordiensi, Wecelone abbate Beliniensi, Berengero preposito Sancti Wodolrici, magistro Nicolao de Lupico infrascripti domini patriarche cancellario et Bernardo de Çucula, Beaquino de Mimiliano, Senesio rictario in Istria et Swarçutto de Top testibus et aliis.
Reverendus pater dominus G(regorius) patriarcha Aquilegensis et nobilis vir dominus Al(bertus) comes Goricie de spontanea et unanimi voluntate concordes fuerunt ad invicem iuxta infrascriptum tenorem, videlicet:
Quod si Commune Iustinopolitanum occasione guerre presentis aut alia occasione offenderent ipsum dominum comitem aut moverent sibi guerra et facerent sibi aliqua dampna, ipse dominus patriarcha ad requisitionem ipsius domini comitis debet mictere nuncium suum vel litteras suas ad dictum Commune, ut satisfaciant dicto domino comiti de offensionibus et dampnis illatis. Quod si predictum Commune facere noluerint, idem dominus patriarcha tenetur et debet iuvare ipsum dominum comitem et astare sibi bona fide pro viribus contra eos. Econverso autem, si Commune predictum occasione presentis guerre vel alia offenderent dictum dominum patriarcham, prefatus dominus comes requisitus pro parte ipsius domini patriarche tenetur et debet astare sibi contra ipsos et iuvare ipsum pro viribus bona fide.
Pro quibus omnibus et singulis attendendis uterque ipsorum dominorum alterutrum obligavit se ad penam mille marcharum Aquilegensis monete, et supradictus dominus patriarcha fecit iurare in anima sua dominos Henricum de Mels, Iohannem de Cucania, Asquinum de Varmo et Cononem de Mimiliano; et dictus dominus comes fecit super anima sua iurare dominos Volricum et Volkerum de Reyfemberch et Lupoldum et Iacobum de Ragonia omnia et singula predicta attendere et servare.
Ad maiorem autem huius rei evidentiam dicti domini patriarcha et comes duo instrumenta exinde unius et eiusdem tenoris fieri et sigilla sua eis apponi fecerunt.
Ego Walterus Civitatensis imperiali auctoritate notarius predictis omnibus interfui et de mandato dictorum dominorum patriarche et comitis scripsi et in publicam formam redegi.
Ego Fridericus de Eberstayn imperiali auctoritate notarius supradictis omnibus interfui et me subscripsi signum proprium apponendo.
See doc. 1267_PC1.
See the editor’s comments for doc. 1267_PC1.